RUS
SMARTNEWS.KZ басылымының хабарлауынша, әнші Ильхан Ихсан Қайрат Нұртасқа қалай ән жазып бергенін және екеуінің қарым-қатынасы туралы AIQAP подкастында айтып берді. Ол белгілі орындаушының хитке айналған «Сен менің адамымсың» әнінің авторы екенін алғаш рет көпшілікке ашық жария етті.
Ильханның сөзінше, Қайрат оған тікелей хабарласпаған. Алдымен актриса Құралай Анарбекова хабарласып, өз киносына саундтрек керек екенін айтқан. Бұған дейін бұл фильмге Садраддин ән орындаған екен, келесі кезек Ильханға келіпті. Әнді тыңдаған соң, Құралай оны ұнатып, қаламақы туралы сөйлесуге көшкен.
«Сол кезде студиядағы ноутбугіміз істемей тұрған еді. Құралай әпкеге ақша емес, ноутбук керек екенін айттым. Құны – 3 миллион теңге. Олар бізге ақшасын беріп, арнайы Америкадан алдыртты. Бірақ Қайрат Нұртаспен сол уақытқа дейін де, кейін де жүздескен емеспін», – дейді ол.
Әнші кейін Қайратпен тек бір рет байланыс орнатқанын айтады:
«Бір күні белгісіз нөмірден видео қоңырау келді. Көтерсем, Қайрат Нұртас екен. “Әнің хит болып жатыр, керемет! Тағы да жазайық” деді. Бірақ сонымен бәрі аяқталды. Ән де жазылған жоқ, байланыс та үзілді. Одан кейін өзі де, көмекшілері де жауап бермеді. Концертіне барғым келді, жаздым – жауап жоқ. Айтуларынша, Қайрат ағамыздың уақыты бір жыл бұрын бекітіліп қояды екен», – дейді Ильхан.