RUS
SMARTNEWS.KZ басылымының хабарлауынша, Жамбыл облысының Шу ауданында мектептің оқу ісі жөніндегі орынбасары бірнеше ауыл тұрғынының алтын бұйымдары мен ақшасын ұрлап, оларды Тараздағы базарда сатқан.
Полиция мәліметінше, 23 шілдеде тұрғындардың бірі кезекші бөлімге шағым түсіріп, белгісіз біреудің үйіне терезе арқылы кіріп, жалпы құны 2,9 миллион теңге болатын алтын әшекей мен қолма-қол ақшаны ұрлап кеткенін айтқан.
Көп ұзамай полицейлер 33 жастағы Шу ауданының тұрғынын ұстады. Ол мектепте завуч болып жұмыс істейтіні анықталды. Үйін тінту кезінде жәбірленушілерге тиесілі ақша мен алтын бұйымдар табылған.
«Аталған факті бойынша ҚР Қылмыстық кодексінің 188-бабы 3-бөлімі 3-тармағы бойынша (тұрғын үйге заңсыз кіріп жасалған ұрлық) сотқа дейінгі тергеу басталды», – деп хабарлады Жамбыл облысы полиция департаменті.
Тергеу барысында ұсталған азаматтың жалпы құны 3 миллион 450 мың теңге болатын жеті бірдей ұрлыққа қатысы бары белгілі болды. Күдікті өз кінәсін мойындаған.