RUS
SMARTNEWS.KZ басылымының хабарлауынша, ұлдарының еміне ақша жинап, елдің жанашырлығын пайдаланған ерлі–зайыптылар 1,3 миллиард теңгеден астам қаржыны жеке бас пайдасына жұмсаған. Бұл туралы Қаржылық мониторинг агенттігінің Астана қаласы бойынша департаменті хабарлады.
Толқын Тотақанова мен Дәулет Тотақанов Instagram және Facebook желілерінде әсерлі бейнероликтер мен жазбалар жариялап, баласына шетелде қымбат ота жасату үшін қаражат жинаған. Оларға арналған жарнама науқаны мақсатты аудиторияға дәл бағытталған – әлеуметтік желідегі қолданушылардың жүрегін елжіретіп, мыңдаған адамның қолдауына ие болған.
Алаяқтық сызбасы
Тергеу материалдарына сәйкес, жиналған 1,3 млрд теңгенің небәрі 6,4 миллион теңгесі ғана баланың еміне жұмсалған. Ал қалған сома елордалық жылжымайтын мүлікке, көліктерге және құмар ойындарға кеткен. Тергеу барысында олардың Астанадан үш пәтер мен жер телімін, сондай-ақ бес автокөлік сатып алғаны анықталған.
Сонымен қатар, ерлі–зайыпты Meta Ads жарнама құралдарын пайдаланып, әлеуметтік желідегі парақшаларын ілгерілету үшін 481 миллион теңгеден астам қаржы жұмсаған. Бұл өз кезегінде алаяқтық арқылы ақша жинау ауқымын ұлғайтуға мүмкіндік берген.
Жалған ота және алдаудың шырқау шегі
Күдіктілер шетелдік клиникада – Түркиядағы LIV Hospital-да 84 миллион теңгеге ота жасатамыз деп жариялаған. Алайда бұл операция ешқашан жасалмаған. Соған қарамастан, олар Instagram желісінде әуежайда түсірілген видеоны жариялап, «операция сәтті өтті» деген жазбамен елді алдауды жалғастырған.
Тергеу басталғанын естіген соң, олар жымқырылған активтерді жасыруға тырысқан. Мәселен, жер телімін үшінші біреудің атына жазып берген, бірақ кейін бұл мәміленің жалған екені дәлелденіп, мүлікке тыйым салынды.
Қазіргі жағдай
Күдіктілерге үйқамақ түріндегі бұлтартпау шарасы қолданылды. Қылмыстық іс сотқа жіберіліп, қазіргі уақытта қаралуда.
Айта кетейік, ҚР Конституциясына және Қылмыстық-процестік кодексіне сәйкес, сот үкімі заңды күшіне енбейінше, кез келген адам кінәсіз деп есептеледі.