RUS
Осы күнге дейін елдер арасындағы саяси қақтығыстар спорттан тыс қалмай келеді. Керісінше, спорт аренасы жиі саяси наразылықтың сахнасына айналуда. Мұндай қарсылық тек шенеуніктерден ғана емес, кейде спортшылардың өзінен де басталады. 2021 жылы Токиода өткен Олимпиада ойындарында екі бірдей дзюдошы жарысқа қатысудан бас тартты – себебі, олар израильдік қарсыласпен татамиге шығуды ар санаған.
SMARTNEWS.KZ басылымының хабарлауынша, 73 келі салмақ дәрежесінде өнер көрсететін алжирлік Фетхи Нурин жеребе нәтижесі бойынша екінші айналымда Израиль спортшысы Тохар Бутбулмен белдесуі мүмкін екенін білгеннен кейін, Олимпиадаға қатысудан бас тартты.
«Біз бұл жарысқа жолдама алу үшін көп еңбек еттік, бірақ палестин халқы мен үшін бәрінен қымбат. Мен Израильмен қарым-қатынасты қалыпқа келтіруге түбегейлі қарсымын. Егер осы ұстанымым Олимпиададан бас тартуыма себеп болса, Алла оған сауаптан жазар», – деді Нурин алжирлік БАҚ-қа берген сұхбатында.
Ол бұл қадамға бұрын да барған – 2019 жылы да Бутбулмен татамиге шығудан бас тартқан еді. Оның бұл жолғы шешімін бапкерлері де толық қолдады. Алжир мемлекеті Израильді ресми түрде мойындамайды, және бұл позиция елдің спорт қауымдастығы арасында да кең қолдау тапқан.
Нуриннің алғашқы айналымдағы қарсыласы, судандық Мохаммед Абдалрасул да дәл сол себеппен жарысқа шықпай қойды. Рас, ол саяси мәлімдеме жасамады, бірақ оның бұл әрекеті де үлкен дау туғызды. Айта кетейік, Судан Токио Олимпиадасына дейін Израильді ресми түрде мойындаған болатын.
Нәтижесінде, Халықаралық дзюдо федерациясы (IJF) мен Халықаралық Олимпиада комитеті (ХОК) екі спортшыны да турнирден шеттетті. Олар енді IJF ұйымдастыратын жарыстарға қатыса алмайды.