RUS
SMARTNEWS.KZ басылымының хабарлауынша, Алматы қаласының тұрғындары Шығыс айналма жолының бойында сарғайған шөпке жасыл түсті сұйықтық шашып жүрген коммуналдық қызметкерлердің әрекетіне таңданыстарын жасырмады. Бұл сәт түсірілген видео желіде кең тарап, қызу пікірталас тудырды.
Кадрлардан жұмысшылардың қураған шөптің үстіне жасыл түсті сұйықтықты бүркіп жүргенін анық көруге болады. Бұл әрекетті желідегілер бірден сынға алды: бірі «шөп бояп жатыр» десе, енді бірі «көзбояушылық» деп бағалады.
Алайда Медеу ауданы әкімдігі бұл оқиғаға қатысты ресми түсініктеме беріп, бұл жай ғана бояу емес екенін мәлімдеді.
«Биылғы қуаңшылықты ескере отырып, Медеу ауданында көгалдың эстетикалық келбетін сақтау үшін құрамында тыңайтқыштар бар, тағамдық бояғыш қолданылады. Бұл — органикалық пигменттерге негізделген, адамдар мен жануарларға зиянсыз құрал. Ол шөпке жасыл реңк беріп, ұқыпты көрініс сақтауға көмектеседі», — деп хабарлады әкімдік.
Сонымен қатар, бұл әдіс көптеген елдерде, әсіресе климаттық жағдайы қолайсыз аймақтарда жиі қолданылатыны айтылды.
Мамандардың айтуынша, бұл — жай бояу емес, шөптің өсуіне көмектесетін гидросебу әдісі. Ол су, тыңайтқыш, шөп тұқымы мен арнайы желімқос қоспадан тұрады. Мұндай технология кеуіп кеткен жерлерді қалпына келтіру және көгалдың қайта өсуі үшін қолданылады.
Гидросебу — бүкіл әлемде танылған әдіс. Әсіресе қуаң, топырағы нашар және еңісті жерлерде көгал өсіру мақсатында кең қолданылады.