RUS
SMARTNEWS.KZ басылымының хабарлауынша, бұрынғы президент Нұрсұлтан Назарбаевтың жары Әсел Құрманбаеваның туысы — Ақмарал Есполованың Дубайдан қымбат апартамент сатып алғаны белгілі болды. Бұл туралы Telegram-арна «Выход к морю» жазды.
Ақпаратқа сәйкес, ол Paramount Tower Hotel & Residences кешенінің 40-қабатынан террасасы бар үш бөлмелі пәтер иеленген. Оның құны – шамамен 520 миллион теңге. Ғимаратты 2021 жылы Қытайдың мемлекеттік құрылыс корпорациясы салған. Төменгі қабаттар – қонақүй, ал жоғарғы қабаттар – тұрғын үй ретінде пайдаланылады. Шатырында бассейн орналасқан.
Ақмарал Есполова – академик Тілектес Есполовтың қызы. Оның отбасы Назарбаевтар әулетімен бұрыннан байланысты. Мәселен, Ақмаралдың інісі Айдос Есполов Болат Назарбаевтың қызы – Гүлмираға үйленген. Олардың баласы Нұрсаин 2022 жылғы Қаңтар оқиғасы кезінде жұрт назарына түскен.
Ақмарал бұған дейін «Орталық Азия отын-энергетикалық компаниясы» мен Астанада тіркелген, бірақ белсенді жұмыс істемейтін YN LLC құрылыс компаниясында үлес иесі болған.
Айта кетсек, ол – Назарбаевтар әулетінің Біріккен Араб Әмірліктеріндегі жылжымайтын мүлікке ие жалғыз мүшесі емес. Бұған дейін «Азаттық» журналистері отбасы мүшелерінің Дубайда миллиардтаған теңгеге бағаланатын мүлік иеленіп отырғаны жайлы зерттеу жариялаған. Солардың бірі – Тимур Құлыбаевтың Абу-Дабиде салып жатқан $24 млн-дық вилласы.
АҚШ-тағы Қорғаныс зерттеулерінің перспективалық орталығының дерегінше, қазақстандықтарға тиесілі Дубайдағы мүліктің жалпы құны $1 млрд-тан асады.