RUS
Соңғы жылдары ауданда инфрақұрылымдық жобалармен қатар құрылыс жұмыстары да қарқынды жүріп, көптеген нысандар халық игілігіне берілді. Атап айтқанда, Арал қаласындағы көпқабатты тұрғын үйлер мен кіре беріс қақпа күрделі жөндеуден өтіп, жаңаша кейіпке енді.
Соңғы үш жылдың ішінде 104 млн теңгеге қаладағы 6 көппәтерлі үй жөнделіп, соның бірі — 16 пәтерлі үй биыл толық аяқталып, пайдалануға берілді. Сонымен қатар, қаланың кіреберіс қақпасын жаңарту үшін 15,7 млн теңге бөлініп, оның сыртқы бөлігі жаңартылып, ұлттық нақыштағы ою-өрнекпен безендірілді, жарық шамдары қайта орнатылды.
Ауданға қарасты елді мекендер арасында санитарлық тазалық пен көркейтуге баса назар аударып, жайлы орта қалыптастырған елді мекендердің бірі — Аманөткел ауылы. Ауыл 2024 жылы өткен «Үлгілі елді мекен» байқауында III орын иеленді.
Ауыл тұрғындарының негізгі кәсібі — балық және мал шаруашылығы. Сонымен қатар, заманауи технологияға негізделген тамшылатып суару әдісі арқылы егін шаруашылығы да дамып келеді. Елді мекеннің бес көшесіне асфальт төселіп, жеті көшеге түнгі жарық шамдары орнатылған.
Ауылда 7000-ға жуық қаратал, терек және жеміс-жидек ағашы бар саябақ бар. Сондай-ақ «Тағзым» алаңы мен «Нұртуған» кесенесі аумағында 300-ден астам ағаш көшеті отырғызылып, тұрақты түрде күтіп-бапталуда. Биыл әлеуметтік нысандардың аумағына қосымша 1000-ға жуық ағаш көшеті егілді.
2025 жылы Арал ауданындағы республикалық, облыстық және аудандық жолдар бойында жасыл белдеу жасауға арналған іс-шаралар жоспары бекітілген. Осыған сәйкес, Аманөткел ауылының кіреберіс жолының бойынан 0,5 гектар жерге жасыл белдеу отырғызылып, алғашқы кезеңде 200 түп терек және қаратал ағашы егілді. Жоба 2025–2026 жылдары көктем-күз мезгілдерінде демеушілік арқылы жалғасады.
Сонымен қатар, Арал қаласындағы тарихи және сәулет тұрғысынан маңызы бар — Арал теңізі станциясының вокзал ғимаратын қалпына келтіру мәселесі күн тәртібінде тұр. Бұл нысан тарихи-мәдени ескерткіш ретінде мемлекет меншігінде тіркелген. Құрылыс жұмыстары болашақта нақтыланатын болады.
