RUS
SMARTNEWS.KZ басылымының хабарлауынша, әнші Димаш Құдайбергеннің қарындасы Раушан Құдайберген мен театр әртісі Ермахан Айымхан шаңырақ көтерді. Қос тарап құдалық өткізіп, жас жұбайларға ақ батасын берді.
Той барысында Құдайбергендер әулетінің ақ жаулықты анасы — Димаштың әжесі Миуа апа немересіне жүрекжарды тілегін арнады:
«Менің кішкентай құлыншаңым, кезінде алақаныма салып өсірген немерем, енді бойжетіп, 24 жасқа келді. Бүгін ол өзінің сүйіктісін тауып, жаңа отбасын құрып, өз ошағын жақты. Ермахан екеуі бақытты өмірге алғашқы қадамдарын жасап жатыр. Бақытты болсын, барлық арман-тілектері орындалсын», — деді Миуа апа.
Салтанатты басқосуға қос әулеттің үлкендерімен қатар, өнер иелері мен отбасы жақындары да жиналды. Қонақтар жас жұбайларға ақ тілегін жаудырып, қуаныштарына ортақтасты.
Жанкүйерлердің айтуынша, Раушан Құдайберген жақын күндері ұзатылмақ. Ал әзірге жастар өздерінің қуанышты сәттерінен бейнематериалдармен бөлісіп, жұрттың ықыласына бөленіп жатыр.