RUS
SMARTNEWS.KZ басылымының хабарлауынша, Абай облысындағы әйелдер колониясынан 8 сотталған азаматша босатылды. Олар Қазақстан Конституциясының 30 жылдығына орай жарияланған рақымшылық аясында еркіндікке шыққан, деп жазды Kazinform.
Абай облыстық қылмыстық-атқару жүйесі департаментінің мәліметінше, өңірдегі әйелдер колониясында шамамен 400-ге жуық адам жазасын өтеп жатыр. Солардың 130-ға жуығы рақымшылыққа ілінген.
— Бүгінгі таңда 8 әйел босатылды. Олардың басым бөлігі орташа ауырлықтағы қылмыс жасағандар. Сонымен қатар кәмелетке толмаған балалары бар екі сотталған әйелдің жаза мерзімі үштен бірге қысқартылды. Алдағы уақытта мекеме әкімшілігі ұсынған жағдайда тағы да сотталғандарға қатысты жеңілдік шаралары қарастырылуы мүмкін, — дейді департаменттің арнайы есеп бөлімінің бастығы, әділет подполковнигі Светлана Голикова.
Бостандыққа шыққандардың бірі алаяқтық дерегі бойынша 5 жылға сотталған екен.
— Бұл жылдар мен үшін өте ауыр болды. Түрмеде жатқанда үш немерем дүниеге келді. Олардың ешбірін көрген жоқпын. Жасаған ісіме қатты өкінемін. Жазамды өтеп жатқанда жақындарыма ешқандай көмегімді тигізе алмадым. Анам биыл 93-ке толды. Балаларым мен немерелерімді қатты сағындым. Үйге оралғаныма шын қуаныштымын, — деді әйел.
Еске салайық, Конституцияның мерейтойына байланысты жарияланған рақымшылық еліміз бойынша бірқатар сотталған азаматтарға жаза өтеу мерзімін қысқартуға немесе мүлде босатуға мүмкіндік беріп отыр.