RUS
SMARTNEWS.KZ басылымының хабарлауынша, Ақтөбедегі мешіт ауласында орын алған даулы жағдай қоғамда үлкен резонанс тудырды. Желіде тараған бейнежазбада ер адамның жас қызға қырындағаны көрініп, бұл іс қоғамның ашуын туғызды.
Оқиғадан соң полиция азаматқа қатысты әкімшілік хаттама толтырып, іс сотқа жолданғанын мәлімдеді.
Бұған қатысты Қазақстан мұсылмандары діни басқармасы да пікір білдірді. ҚМДБ өкілдері ислам шариғатында әйел затына тіл тигізу, орынсыз пікір айту – мұсылмандық әдепке сай келмейтін әрі айыпталатын әрекет екенін баса айтты.
Аталған оқиғаға қатысты өнер иелері де үн қатып, пікір білдірді. Әнші Рүстем Жүгінісов өз парақшасында әйелдердің мешітке ағасымен немесе күйеуімен келуі керек деген көзқарасын жазған еді. Алайда бұл сөзі әлеуметтік желі қолданушыларының сынына ұшырап, қоғам наразылығын тудырды.
Кейіннен әнші өз жазбасы жайлы түсініктеме беріп, көпшіліктен кешірім сұрады:
«Соңғы күндері тарап жатқан жазбаларыма қатысты түсініктеме бергім келеді. Бірінші жазбамда бұл жағдайда ер адамның әрекеті — толықтай қате екенін айттым. Бұл — айқын. Дінімізде «бір күндік неке» деген ұғым жоқ. Ал екінші жазбамда, өкінішке қарай, эмоцияның жетегінде кетіп, ойымды дұрыс жеткізе алмадым. Кей сөздерім қатты шығып кетті. Бұл — менің қателігім. Біз зайырлы елде тұрамыз. Әр адамның өз таңдауы бар. Ешкімге көзқарас таңуға тырысқан жоқпын. Барша шешімді құрметтеймін», — деп жазды ол Instagram желісінде.
Осылайша, әнші қоғам алдындағы сөзі үшін жауапкершілік алып, қателігін мойындады.