RUS
SMARTNEWS.KZ басылымының хабарлауынша, Димаш Құдайбергеннің қарындасы Раушанның ұзату тойында ерекше музыкалық тосынсый болды — сахна төріне әйгілі композитор, Ресейдің халық әртісі Игорь Крутой шықты. Ол Димашпен бірге рояльде сүйемелдеп, «Любовь уставших лебедей» әнін орындады.
Желіде тараған бейнежазбада салтанатты кештің жайлы әрі шынайы атмосферасы көрініс тапқан. Димаш пен Крутойдың дуэті отбасы мен қонақтар үшін шын мәнінде әсерлі әрі есте қаларлық сәт болды.
«Димаш пен маэстро Игорь Крутой Раушан мен Ермаханның үйлену тойында өнер көрсетті», — деп жазылған dimash.musicclub Instagram парақшасындағы жазбада.
Игорь Крутойдың Қазақстанға келіп, Құдайбергендер отбасының қуанышына ортақтасуы жанкүйерлердің ыстық ықыласына бөленді. Көпшілік мұны маэстро мен Димаш арасындағы ерекше достықтың белгісі деп қабылдады.
Желі қолданушылары пікірлерінде:
«Мұндай той ұмытылмайды!», «Қыз ұзатуда Крутойдың өзі ойнаса – бұл енді тарих!», «Димаш пен Крутой — әр аккордта сиқыр бар!» – деп жарыса жазды.
Айта кетейік, 1 тамыз күні Құдайбергеновтер әулеті Раушанға құда түсіп, қазақы дәстүрмен ұзату тойын өткізген еді. Салтанатты кешке әнші Әмре де қатысып, өзінің жылы лебізін білдірді.
Ал Димаш Құдайберген қарындасына арналған ерекше жазбасында оның өміріндегі маңызды сәт үшін жүрекжарды тілегін жеткізген болатын.