RUS
SMARTNEWS.KZ басылымының хабарлауынша, Астанадағы №90 «Еркежан» балабақшасында тәрбиешінің салғырттығынан 5 жасар бала мекеме аумағынан жалғыз кетіп қалып, үйіне қарай бет алған. Қауіпті жолдарды кесіп өткен бүлдіршінді анасы өзі іздеп тауып алған. Оқиға қоғамның қызу талқысына түсіп, ата-аналар тарапынан наразылық тудырды.
Бала анасының айтуынша, бейнебақылау жазбасында оның баласы сағат 15:34 шамасында топтан шығып, қайта бір сәтке кіріп, ешкім оны іздемегенін көріп, тыныш кете бергені анық байқалады.
— Бірінші қабатта отырған вахтер балаға жол көрсетіп тоқтатқысы келген, бірақ оның сыртқа бет алғанын көріп, әдіскерге хабар береді. Әдіскер барлық топтағы балалардың санын тексеріп шыққаннан кейін ғана тәрбиеші баланың жоқ екенін түсінген, — дейді баланың анасы.
Тәрбиеші алғашында баланы әкесі алып кетті деп айтқанымен, бұл мәлімет расталмаған. Бұған дейін де ата-аналар тарапынан осы тәрбиешіге байланысты шағымдар болған. Соған қарамастан, мекеме басшылығы оған тек ескерту беріп, жұмысын жалғастыруға рұқсат еткен.
Анасы баласын өз бетінше іздеуге шығып, оны бірнеше құрылыс алаңы мен қауіпті техникалар орналасқан аумақтан өткен кезде тауып алған.
— Осындай жағдайдан кейін де тәрбиеші өз кінәсін мойындамады. Тіпті ата-аналар чатына шығып, кешірім де сұрамады. Бұл оның жұмысқа, балалар мен ата-аналарға деген көзқарасын анық көрсетеді, — деп қосты ол.
Астана қаласы Нұра ауданының полиция басқармасы оқиғаға қатысты мәлімдеме жасады:
«Кәмелетке толмаған баланың заңды өкілінен түскен өтініш бойынша Нұра аудандық полиция бөлімі Астана қаласының Білім сапасын қамтамасыз ету департаментіне ресми ұсыныс жолдады. Онда балабақша қызметкерлеріне қатысты шара қолдану сұралған», — делінген хабарламада.