RUS
SMARTNEWS.KZ басылымының хабарлауынша, Жетісу облысында нөсер жауын салдарынан Сарыөзек ауылы су астында қалды. Бар-жоғы 30 минутқа созылған жауын салдарынан 50-ге жуық үйдің ауласы мен сегіз баспана суға толған. Құтқарушылардың айтуынша, мұндай көлемде жауын-шашын бұл өңірде соңғы он жылда болмаған. Бұл туралы КТК арнасы жеткізді.
Күшті су ағыны суағар құбырды жарып жіберген. Соның кесірінен жолдар шайылып, тұрғын үйлердің ішіне дейін су кірген. Ауыл тұрғындары суды шелектермен төгіп шығаруға мәжбүр болған. Кей жерлерде қоршаулар құлап, электр желілері зақымданған.
Құтқару қызметінің мәліметінше, тұрғындарға дауыл туралы алдын ала ескерту берілген. Бірақ осындай ауқымды апатқа ешкім дайын болмаған.
Ресми нұсқаға сүйенсек, тасқынға үйлердің іргетасы тым төмен орналасқаны себеп. Алайда тұрғындар бұл пікірмен келіспейді. Олардың айтуынша, негізгі проблема – ескі дренаж жүйесінде. Мұндай жағдайлар алғаш рет емес. Ауыл халқы бұрын да суағар жүйесін ауыстыруды сұраған.
Қазір ауылда құтқарушылар мен арнайы техника жұмыс істеп жатыр. Жергілікті жұртпен бірге қоқыс пен лайды тазартып, жағдайды тұрақтандыруда.
«Су басқан сәттен бастап оқиға орнына ТЖД, жеке құрам мен жергілікті әкімдік техникасы тартылды. Қазір де инженерлік техникамен аулалар тазартылып жатыр. Жауын-шашын мөлшері нормадан әлдеқайда көп түсті. Соңғы жеті-тоғыз жылда Сарыөзекте мұндай аномалия болған емес», — деді Кербұлақ аудандық ТЖ бөлімінің бастығы Айбек Өмбетов.