RUS
SMARTNEWS.KZ басылымының хабарлауынша, 2025 жылдың алғашқы жартысында Қытай Қазақстанға 77,6 мың автокөлік экспорттаған. Бұл — өткен жылмен салыстырғанда екі есе көп. Бұл туралы Yicai басылымы жазды.
Осының арқасында Қазақстан қытайлық автокөліктерді ең көп импорттайтын 10 елдің қатарына енді. Ал керісінше, Ресей көшбасшылар қатарынан шығып қалды — бұл елге жеткізу көлемі 59 пайызға азайып, 171 мың көлікке дейін түскен. Сарапшылар мұны автокредит бойынша мөлшерлемелердің өсуімен және утилизациялық алымдардың қымбаттауымен байланыстырады.
Сондай-ақ Қытайдан Бразилияға жеткізу 7,9%-ға азайса, Мексика мен БАӘ импортты едәуір арттырған — тиісінше 31% және 59% өсім көрсеткен.
Жалпы, Қытай 2025 жылдың алты айында шетелге 3,08 миллион автокөлік жіберді. Оның 1,06 миллионы — электрлі көліктер (NEV). Экспорт көлемінің негізгі бөлігін Chery (544 900 дана) және BYD (443 100 дана) маркалары құрады. BYD компаниясы жеткізуді 118 пайызға арттырған.
Айта кетейік, Қытай көліктеріне сұраныс артқанымен, Қазақстанда олардың сапасына байланысты шағымдар көбейген. 2024 жылы Тұтынушылардың құқықтарын қорғау комитетіне осы мәселеге қатысты 57 арыз келіп түскен. Кей жағдайларда көлік иелері ақшасын қайтарып алуға немесе көлікті ауыстыруға сот арқылы қол жеткізген.