RUS
Қазақ спортының болашағы саналатын Қуанышбектің бұл жеңісі ел назарынан тыс қалған жоқ. «Қазағымның жылқысы» деген атпен бірігіп, арнайы WhatsApp тобында шоғырланған 600-ге жуық ақтөбелік жылқышы чемпионды марапаттауды жөн көрген. Сонымен қатар, оның екі бапкеріне бір-бір жылқы мен ақшалай сыйлықтабысталды.
Күрес жанашыры Данияр Ғалихановтың айтуынша, мұндай қолдау — жылқышылар қауымының бұрыннан қалыптасқан дәстүрі. Олар үлкен жарыстарда ел намысын абыроймен қорғаған қазақ спортшыларынжылқымен марапаттап келеді.
«Мақсатымыз – жастарды ынталандыру. Спортта нәтиже көрсету үшін қаншама еңбек керек. Біз осы еңбекті бағалаймыз. Қуанышбек – Афинада чемпион атанып, барша қазақтың мерейін өсірді. Сол үшін оған 20 бас жылқы сыйладық. Бұған дейін де әлем чемпиондары Ризбек Айтмұхан мен Нұрғожа Қайпановқа дәл осылай жылқы бергенбіз», — дейді Ғалиханов.
Оның айтуынша, бүгінге дейін 143 бас жылқы үлестірілген. Жылқышылар тек спортшыларды ғана емес, күрес ардагерлері мен жаттықтырушыларын да назардан тыс қалдырмай, қолдан келгенше қолдау көрсетіп келеді.
Айта кету керек, Ақтөбе өңірінің жылқышылары – ешқандай мемлекеттік қолдаусыз, өз еңбегімен күнелтіп жүрген ауыл азаматтары. Соған қарамастан, олар қазақтың намысты ұл-қыздарына құрмет көрсетуге келгенде жомарттық танытып отыр.