RUS
SMARTNEWS.KZ басылымының хабарлауынша, Атырауда тергеу соты блогер Құндыз Идрисованы үйқамаққа шығару туралы өтінішті қанағаттандырмай, оны қамауда қалдыруға шешім қабылдады. Енді ол сотқа дейінгі тергеу аяқталғанша тергеу изоляторында отырады.
Бастапқыда Идрисоваға Қылмыстық кодекстің 194-бабы («Қорқытып алу») бойынша айып тағылған. Тергеу дерегінше, ол Instagram парақшасынан кәсіпкерге қатысты жағымсыз жазбаларды өшіру үшін ақша талап еткен.
Алайда кейін оған Қылмыстық кодекстің 380-бабы («Билік өкіліне күш қолдану») бойынша қосымша айып тағылды. Полиция өкілдерінің айтуынша, ұсталған кезде Идрисова қарсылық көрсеткен.
Жақын туыстарының сөзіне қарағанда, күш құрылымдары пәтерге ешқандай құжат көрсетпестен, аяқ киімдерін шешпей кіріп, балалардың көзінше Құндызды жерге құлатқан. Ол кезде Идрисова балаларының жанында болған.
— Аталған факт бойынша Қылмыстық кодекстің «Қорқытып алу» және «Билік өкіліне күш қолдану» баптары аясында сотқа дейінгі тергеу амалдары жүріп жатыр. Тергеу мүддесіне байланысты өзге ақпарат жарияланбайды, — деп мәлімдеді Атырау облыстық полиция департаменті.