RUS
SMARTNEWS.KZ басылымының хабарлауынша, Қазақстанда магистратураға түсуге дайындық жүргізетін жекеменшік оқу орталығы үлкен дауға қалды. Курсты жарнамалаған танымал блогерлердің сендірген уәдесіне алданған талапкерлер емтиханда мүлде басқа сұрақтар келгенін айтып шағымдануда. Бұл туралы Жетінші арна жеткізді.
Ақтөбелік Гүләмина Нұриқұлова ағылшын тілі пәнінің мұғалімі мамандығы бойынша магистратураға түсуге дайындалған. Оның айтуынша, 100 мың теңгелік курс жарнамасын блогерлердің парақшасынан көріп, сеніп қалған. Орталық өкілдері «Ұлттық тестілеу орталығымен бірлесіп дайындалған» деген желеумен арнайы платформаға қолжетімділік берген. Бірақ дайындық сұрақтары шынайы емтиханмен мүлде сәйкес болмаған.
«Платформадағы сұрақтар дұрыс емес екенін байқадым. Ескерту жасадым. Бірақ ешкім тыңдамады. Кейін емтиханнан соң бізді өзімізді кінәлады. Сабақтардың рейтингісін төмендетіп, нәтижемізді өшіріп тастады. Мұны ашық алаяқтық деп есептеймін», – дейді талапкер.
Осыған ұқсас жағдайды Талдықорған қаласының тұрғыны Акерке Сансызбай да бастан кешкен. Ол қазақ тілі пәнінен дайындық сұрақтарының мазмұны күмән туғызғанын, ал нақты емтиханда мүлде басқа тапсырмалар келгенін айтады.
«Сынаққа 3–4 күн қалғанда сұрақтардың шынайы еместігін түсіндім. Бірақ ол кезде кеш еді. Соңында тест қиын болып шықты», – дейді ол.
Ал Ұлттық тестілеу орталығының мәліметінше, тест материалдары ешқандай үшінші тарапқа берілмейді. Орталық өкілдері күмәнді жарнамаларға сенбеуге шақырады.
«Интернеттегі «нақты сұрақтар» немесе «емтиханға дайын жауаптар» деген жарнамалар – жалған. Ұлттық тестілеу орталығы ешқандай сұрақ таратпайды. Жыл сайын тест сұрақтары жаңартылып, сараптамадан өтеді», – деді орталық басшысының орынбасары Наужан Дидарбекова.
Маманның айтуынша, алаяқтар талапкерлердің сенімін пайдаланып, тестілеу жүйесін жалған ақпаратпен бұрмалауға тырысады. Ал нақты сынақтар мен сұрақтар мемлекеттік қорғауда болады.