RUS
SMARTNEWS.KZ басылымының хабарлауынша, Қостанай қалалық соты жолаушы әйелдің тасымалдаушы компанияға қарсы қозғаған азаматтық ісін қарап, моральдық зиян үшін өтемақы өндіру туралы шешім шығарды.
Оқиға 2024 жылдың тамыз айында болған. Автобус жүргізушісі жаяу жүргіншіні қағып кетпеу үшін кенет тоқтап қалған. Осы сәтте қоғамдық көлікте отырған зейнеткер әйел ауыр жарақат алып, мойын омыртқалары сынып, ауырсыну және бұлшықет рефлекторлық синдромына шалдыққан.
Сот-медициналық сараптама әйелдің жабық сынық алғанын растады. Ал жүргізуші жәбірленушіге 300 мың теңге көлемінде дәрі-дәрмек сатып алу үшін өз еркімен ақша берген.
Сот мәліметінше, жоғары қауіп көзі болып саналатын көлік құралынан зиян келтірілген жағдайда, кінәнің бар-жоғына қарамастан моральдық зиян өтелуге тиіс. Дегенмен, судья жүргізушінің өз еркімен өтемақы төлеуін ескеріп, тасымалдаушы компания – «Ж» ЖШС-нен зейнеткердің пайдасына 200 мың теңге көлемінде қосымша моральдық өтемақы өндірді.
Айта кетейік, сот шешімі әзірге заңды күшіне енген жоқ.