RUS
SMARTNEWS.KZ басылымының хабарлауынша, Шығыс Қазақстан облысында порнографиялық сипаттағы бейнематериалдарды заңсыз өндірумен және таратумен айналысқан қылмыстық топтың жолы кесілді.
Қылмыстық топ өзін «модельдік агенттік» ретінде көрсетіп, елдің кемінде 10 қаласында, соның ішінде Өскеменде вебкам-студиялар ашқан. Студиялар арқылы ашық трансляциялар жүргізіліп, оларға 18 бен 25 жас аралығындағы қыздар тартылған. Ұйымдастырушылар қыздарға айына 2 миллион теңгеге дейін табыс табуға болатынын айтып, жұмысқа шақырған.
Жедел-іздестіру іс-шаралары барысында бұл бизнестің ұйымдастырушылары 1 миллиард теңгеден астам заңсыз табыс тапқаны белгілі болды.
Тінту кезінде 120-дан астам компьютер, веб-камера, жарық жабдықтары және басқа да техникалар тәркіленді.
Қазіргі таңда бұл іске байланысты 14 күдікті ұсталды, олардың арасында аталған бизнесті ұйымдастырған негізгі тұлғалар да бар. Тергеу аяқталуға жақын.
Полиция азаматтарды интернет арқылы ұсынылатын «оңай табыс» жолдарына сақ болуға шақырып отыр. Егер жұмыс заңмен бекітілмесе немесе күмәнді сипаттарға ие болса, ондай қызметтерден бас тарту ұсынылады.