RUS
SMARTNEWS.KZ басылымының хабарлауынша, Балқашта 8 жастағы баланы қатыгездікпен ұрып-соқты деген күдікке ілінген «Қазақмыс» компаниясының қызметкері екі айға қамауға алынды. Сонымен қатар, полиция баланы зорлау дерегі бойынша да тексеру жүргізіп жатыр.
Қарағанды облысы полиция департаментінің мәліметінше, күдікті қамауға алынып, сотқа дейінгі тергеу басталған.
«Күдіктінің “жәбірленуші кәмелетке толмаған бала оның кішкентай қызына сексуалдық сипаттағы заңсыз әрекет жасауға тырысты” деген мәлімдемесіне байланысты, тергеушілер оқиғаның толық және объективті картинасын анықтау үшін қажетті шаралардың барлығын жүргізіп жатыр. Екі тараптың да нұсқалары тексерілуде», – деді полиция өкілдері.
Еске салайық, жергілікті тұрғын Мәдина Досымбекова «Қазақмыс» қызметкерін өз ұлын азаптап, ауыр соққыға жықты деп айыптаған. Оның айтуынша, күдіктінің полиция, аурухана және өзге де мемлекеттік органдарда таныстары бар, сондықтан істі жабуға тырысқан. Ол бұл оқиғаны жұртшылыққа жариялап, әділ тергеу жүргізуді талап етті.
Ал күдіктінің өзі 8 жастағы баланың оның қызына қорлық көрсеткенін алға тартқан. Полиция осы дерек бойынша тағы бір қылмыстық іс қозғады. Тергеу жалғасуда.