RUS
SMARTNEWS.KZ басылымының хабарлауынша, Орал қаласының тұрғыны бұрынғы күйеуінің баласына қатыгездік көрсеткенін және алимент төлемей жүргенін айтып, баспасөзге жүгінді. Әйелдің айтуынша, ер адам ұлын исламдағы кәлиманы айтқызу үшін ұрып-соғып, шаңсорғышты қосып бір бөлмеге қамап қойған.
«Ортақ баламыз бар. Балама кәлиманы үйретемін деп осылай ұратын. Қазір ұлым мүлдем сөйлемейді. Диагнозымен күресіп келеміз. Жалғыз өсіріп отырмын. Халықтың көмегімен емдетіп жүрмін. Кеше сотта алимент төлемеу үшін баласынан бас тартқысы келді. Бар мүлкін жасырып, өзін жұмыссыз етіп көрсетіп қойған», — деді әйел.
Оның сөзінше, қатыгездікке ұшыраған бала қазір тілсіз қалған және ем қабылдауда. Әйел бұрынғы жұбайының өзіне де бірнеше мәрте қол көтергенін айтады.
«Баламды шаңсорғышты қосып, бөлмеге қамап қоятын. „Лә иләһә иллАллаһ, Мұхаммадур расулуллаһ“ деп айтпады деп ұрысатын. Сол кезден бастап ұлым сөйлей алмай қалды. Өзімді де түнде сабайтын. Таңертең полиция келіп, ауруханаға жеткізді. Бірақ оған ешқандай шара қолданбады. Арызымды жойып жіберді», — дейді ол.
Әйелдің айтуынша, бұрынғы күйеуі Оралда қайырымдылық істерімен айналысып, намазхан қауым арасында белгілі адам болған.
«Бұл кісіні көпшілік жақсы таниды. Қайырымдылық жасағаны үшін оны жақсы адам деп санайды», — дейді келіншек.
Алимент өндіру ісі бойынша сот отырысы өтіп, әйел ұлын емдету үшін сотқа жүгінгенін айтты. Қазір ол пәтер жалдап тұрады.