RUS
SMARTNEWS.KZ басылымының хабарлауынша, Батыс Қазақстан облысында қайғылы оқиға орын алды. 10 шілдеде Теректі ауданы Ақжайық ауылында Жайық өзені жағасында екі мұғалім 13 жастағы қызды құтқару кезінде суға батып кетті. Бұл туралы Uralskgorod жазды.
Оқиға куәгерлерінің айтуынша, отбасымен демалып отырған ер адам өзенде қыздың батып бара жатқанын байқап, айғайлаған даусын естіген. Қыздың ағасы дереу суға секіріп, оны құтқаруға ұмтылды. Сол сәтте 37 жастағы Қанат Шайхиденов те көмекке келді.
Қыз аман-есен құтқарылғанымен, екі ер адам жағалауға шыға алмай, суға кетті.
Қанат Шайхиденов Ақжайық ауылындағы мектепте ағылшын тілі пәнінің мұғалімі болып жұмыс істеген. Артында жары мен бес баласы қалды. Үлкен ұлы аутизммен ауырады, ал кенжесі небәрі үш айлық.
Екінші марқұм — 25 жастағы Бекарыс Амиров. Ол Астанадағы Әбіш Кекілбаев атындағы BINOM мектебінде физика пәнінің мұғалімі еді. Жазғы демалысын туған ауылында өткізуге келген. Тамыз айында үйлену тойын өткізу жоспарланған болатын.
Айта кетейік, бұған дейін Ақтөбе су қоймасында екі кішкентай бала суға кеткені хабарланған.