RUS
SMARTNEWS.KZ басылымының хабарлауынша, белгілі продюсер Гүлзира Айдарбекова ұлы Қайрат Нұртастың сахнада киген қымбат костюмін ұтысқа тікті.
Продюсердің айтуынша, бұл — жаңа өнімінің таныстырылымына орай ұйымдастырылған алғашқы тікелей эфирдегі сыйлық.
«Легендамның легенда костюмін эфирде сыйлаймын. Алғашқы эфир болғандықтан, ерекше сый жасағым келді. Бәріне ақша мен көлік керек екенін білемін. Бірақ халықтың сұрауымен, ұлымның сахналық киімін жолы жұғысты болсын деп бергім келді. Қазағымның маңдайына біткен жұлдыздың жолы сіздерге де жұғысты болсын», — деді Гүлзира Айдарбекова.
Айдарбекова бұған дейін жеке кәсіпке бет бұрғанын айтқан болатын. Оның сөзінше, ол әзірлеп жатқан сусабын — Қазақстанда теңдесі жоқ өнім.
«Мұндай сусабынды әлі ешкім шығарған жоқ. Бұл — менің 20 жылдық арманымның жемісі. Ішінде менің энергиям мен байлықтың иісі бар. Қайраттай ұлды дүниеге әкелген ананың еңбегімен жасалған. Бағасы мен сапасы көңілден шығады, құндылығы өте жоғары», — деді продюсер.