Жамбылда ер адамды ұрып-соғып, оның Lexus көлігін айдап кеткен ер адамға сот үкім шығарды
Айыпталушы кінәсін толық мойындады.
SMARTNEWS.KZ басылымының хабарлауынша, Сарысу аудандық сотында төбелес кезінде танысын ұрып, кейін оның көлігін мініп кеткен тұрғынға қатысты іс қаралды.
Оқиға 2025 жылдың сәуірінде болған. Айыпталушы достарымен бірге ішімдік ішіп отырып, жанжал кезінде бірін бірнеше рет ұрып, есінен тандырған. Осыдан кейін ол есік алдында кілті ішінде қалған Lexus ES300 көлігін айдап кеткен. Тергеу деректеріне сай, көлікті иелену ұрлық мақсатында жасалмаған.
Сотта айыпталушы кінәсін толық мойындап, жасаған ісіне өкініш білдірді. Ол жәбірленушімен татуласқанын айтып, кешірім сұраған. Жәбірленуші материалдық шығын толық өтелгенін және ешқандай шағымы жоқ екенін растады.
Сот жеңілдететін жағдай ретінде айыпталушының кінәсін мойындауын және кәмелетке толмаған баласының барын ескерді. Қатаңдататын мән-жайлар анықталған жоқ.
Нәтижесінде ер адам ҚР ҚК-нің 200-бабы («Автокөлікті заңсыз иелену») және 108-1-бабы («Денсаулыққа жеңіл зиян келтіру») бойынша кінәлі деп танылып, бір жылға бас бостандығын шектеу жазасына кесілді.
Үкім заңды күшіне енді.
Материал авторы
