Қаңтар оқиғасынан қалған қарулар елдің бірнеше өңірінен табылды

SMARTNEWS.KZ басылымының хабарлауынша, Ұлттық қауіпсіздік комитеті заңсыз айналымдағы қару-жарақтарды тәркілеу бойынша мәлімдеме жасады.

Ведомствоның хабарлауынша, 2025 жылдың тамызынан бастап ҰҚК полициямен бірге, прокуратураның үйлестіруімен бірқатар өңірде жедел-іздестіру іс-шараларын жүргізді. Операциялар Астана мен Шымкентте, сондай-ақ Атырау, Жамбыл, Қарағанды, Павлодар, Солтүстік Қазақстан және Ұлытау облыстарында өтті.

Бұл іс-шаралар кезінде, соның ішінде «Қаңтар оқиғасы» кезінде ұрланған қарулар тәркіленді.

«12 Калашников автоматы, 6 тапанша, 15 мылтық, 3 граната және 500-ден астам оқ-дәрі алынды. Аталған деректер бойынша тергеу амалдары жүргізілуде. Жұмыс әрі қарай да жалғасады», – делінген ҰҚК хабарламасында.