RUS
Алматы қалалық полиция департаментінен хабарлағандай, биылғы екі айда қала жолдарында жол ережесін бұзудың 49 мың 507 дерегі анықталды. Ал автоматты режимде жұмыс істейтін бақылау-өлшеу техникалық құрылғылары арқылы 127 мың 856 мәрте жол ережесін бұзу дерегі тіркелді.
«Айту керек, 9 мыңға жуық жол ережесін бұзу дерегі шетелде тіркелген автокөлік жүргізушілерімен, яғни, көршілес мемлекеттердің мемлекеттік тіркеу нөмірлері бар көлік жүргізушілері тарапынан жасалған. Салынған айыппұлдың жалпы сомасы 26 млн теңгеден асады. Бұрын хабарлағандай, «Қорғау – Қауіпті жүргізуші» автоматтандырылған жүйесі мен саптағы полиция бөлімшелері осыған ұқсас құқық бұзушылықтарды анықтауға барынша жұмылдырылған. Біздің міндетіміз – мұндай деректердің алдын алу және мұндай тәжірибені жою», – деді Алматы қалалық полиция департаментінің Әкімшілік полиция басқармасының бастығы Асхат Құлбаев.
Ол сондай-ақ тәулігіне 800 мыңнан астам көлік жүретін ірі қалада «Қорғау – Қауіпті жүргізуші» жүйесі өзінің тиімділігін көрсеткенін атап өтті. Бұл жүйенің арқылы жалған нөмірлерді пайдаланатын жүргізушілерді, жарыс ұйымдастырып, көлікті агрессивті жүргізетіндерді, сондай-ақ, жол ережелерін елемейтін жол қозғалысына қатысушыларды анықтауға бағытталғанын жеткізді.