RUS
SMARTNEWS.KZ басылымының хабарлауынша, Қазақстанда әлеуметтік желілерде қайырымдылық мәселесіне қатысты үлкен пікірталас өрбіді. 4 баланы жалғыз бағып отырған Гүлім Болатжан есімді әйел халықтың көмегімен жиналған 13,5 миллион теңгені ала алмай жүргенін айтты. Оның сөзінше, қаражатты басқарған қайырымдылық қорының жетекшісі Ырысбала Икрамбай ақшаны беруден бас тартқан. Бұл туралы Skifnews.kz жазды.
Гүлімнің жазбасы қоғамда қызу талқы тудырды. Кейбір қолданушылар ананы қолдап, «егер қаражат жиналса, толықтай берілуі керек» десе, енді бір бөлігі керісінше пікір білдірді:
«Ешкім пәтер сыйлауға міндетті емес. Барлығы секілді еңбек етіп, табыс табу қажет» – дейді сын айтушылардың бірі.
«Қордың мұндай әрекеті – халық сенімін алдау. Жиналған ақша мұқтаж адамға жетуі тиіс» – деп қарсы пікір білдіргендер де бар.
Талқылауға қатысқандардың кейбірі ананың өмірлік жағдайын түсіністікпен қабылдауға шақырды:
«Әркімнің тағдыры әртүрлі. Мүмкін, күйеуі қайтыс болған немесе денсаулығында қиындық бар шығар. Асығыс үкім шығармау керек» – деп ананы жақтаушылар жазды.
Ал өзгелері «балаларды дүниеге әкелген соң мемлекеттен немесе халықтан талап ету дұрыс емес» деген уәж келтірді. Тіпті бір қолданушы өз өмірінен мысал келтірді:
«Менің әжем 33 жасында жесір қалды. Төрт баласын жалғыз өсіріп, аяқтандырды. Ешқашан шағым айтқан жоқ».
Бұған қоса, қайырымдылық қорына да сын көп. Желі қолданушылары «егер қор жиналған ақшаны мұқтаж жанға бермесе, бұл – халықтың сенімін теріс пайдалану» деген пікірде.