RUS
SMARTNEWS.KZ басылымының хабарлауынша, Президент Қасым-Жомарт Тоқаев 8 қыркүйекте Парламент палаталарының бірлескен отырысында халыққа дәстүрлі Жолдауын жариялайды. Бұл құжат әдеттегідей алдағы жылға арналған негізгі бағыттарды айқындайды – заң шығару мен Үкіметтің жұмыс жоспары осыған сүйенеді.
Сарапшылардың болжамынша, биылғы Жолдауда экономикалық және ішкі қауіпсіздік мәселелері, цифрландыру, көлік дәліздері мен энергетика саласы басымдыққа ие болады.
Саясаттанушы Айдар Әміребаевтың пікірінше, Қазақстанның еуразиялық және цифрлық жобаларға қатысуы, соның ішінде Транскаспий бағыты мен талшықты-оптикалық инфрақұрылымды дамыту басты тақырыптардың бірі болуы ықтимал.
Айта кетейік, биыл Жолдау уақыты сәл өзгерді. Ақорданың хабарлауынша, қыркүйектің басында Мемлекет басшысы Бейжіңге барып, ШЫҰ саммитіне және Екінші дүниежүзілік соғыстың аяқталуына арналған іс-шараларға қатысады.
Бұған дейін Президент жыл соңына дейін ауылдық елді мекендерде медициналық нысандар құрылысына нүкте қоюды, отандық дәрі-дәрмек өндірісін жолға қоюды және міндетті әлеуметтік медициналық сақтандыру жүйесін жетілдіруді тапсырған болатын.