RUS
SMARTNEWS.KZ басылымының хабарлауынша, Ресейдің дрондар мен ракеталар арқылы жасаған ауқымды шабуылынан кейін қаза тапқандардың саны сегіз адамға жетті, олардың арасында бір бала бар. Бұл туралы Украина президенті Владимир Зеленский хабарлады. Тағы 20-дан астам адам жарақат алған.
Зеленскийдің айтуынша, қазір Киевте қираған тұрғын үйлердің астынан адамдарды іздеу жалғасып жатыр.
«Қалаға кезекті жаппай соққы жасалды. Бүгінде, өкінішке қарай, кемінде сегіз адамның қаза тапқаны белгілі, оның ішінде бір бала бар. Он шақты адам жараланған. Ресей тағы да баллистика таңдады, келіссөзді емес. Бұл – соғысты тоқтатудың орнына, қырып-жоюды жалғастырудың белгісі», – деп жазды Зеленский Telegram-арнасында.
Ол сондай-ақ әлем елдерін үнсіз қалмауға шақырып, Ресейге қарсы жаңа қатаң санкциялар енгізу қажеттігін айтты.
Киев қалалық әскери әкімшілігінің басшысы Тимур Ткаченко Дарницкий ауданында бірнеше ғимаратқа ауыр зақым келгенін мәлімдеді. Бес қабатты тұрғын үйге тура соққы жасалған.
«Барлығы қираған», – деді ол.
Жергілікті биліктің дерегінше:
Шабуыл 20-дан астам ауданға әсер еткен;
Шамамен 100 ғимарат бүлінген, соның ішінде қала орталығындағы сауда орталығы бар;
Мыңдаған терезе сынған;
Қаланың әр аумағында өрттер шыққан.
Днепровский ауданында үш қабатты кеңсе ғимараты мен 25 қабатты үйде өрт болды. Ал Шевченковский ауданында тұрғын үй, кеңсе, білім беру мекемесі және тағы екі нысан зақымданған.
Ресейдің бұл соққысы – АҚШ президенті Дональд Трамп пен Ресей президенті Владимир Путиннің осы айдың басында Аляскада өткен кездескеннен бергі Киевке жасалған ең ірі шабуыл болып отыр. Ол кездесуде соғысты тоқтату мәселесі талқыланған еді, бірақ нақты нәтижелер әлі байқалмайды.
Зеленскийдің айтуынша, Украина қазір АҚШ пен одақтастарынан Ресейге қарсы жаңа санкциялар күтіп отыр.