RUS
SMARTNEWS.KZ басылымының хабарлауынша, Түркістанда жүкті әйелді тексеруге барған жедел жәрдем фельдшері соққыға жығылды.
Оқиға түсік тастау қаупі бар деген шақырту кезінде болған. 26 жастағы фельдшер Құдырет Мүтәліповнауқастың ішін ұстап тексермек болғанда, жанында тұрған күйеуі ашуға беріліп, медициналық қызметкерге жұдырық жұмсаған.
«Алдымен бетінен ұрды, басы қабырғаға соғылып қалды. Кейін аяғымен бірнеше рет тепті. Сол кезде иығына да зақым келді. Шамданған күйеуін ажыратып алуға анасы араласты», – дейді оқиға куәгері, фельдшермен бірге барған практикант Жанель Қуанышбек.
Фельдшер ауыр жарақатпен ауруханаға түсті. Оның миы шайқалып, басынан қатты соққы алған. «Кешегі күн есімде жоқ», – деген Құдырет қазір травматология бөлімінде жатыр. Дәрігерлердің айтуынша, оған кемінде екі апта ем қажет.
«Пациентке жабық бас жарақаты, ми шайқалуы, көз айналасының жұмсақ тіндері зақымдануы диагнозы қойылды. Қазіргі жағдайы – орташа ауыр», – деді Түркістан орталық ауруханасының бас дәрігері Бекзат Берденов.
Облыстық жедел жәрдем стансасы фельдшер жұмысқа оралғанша оның орны сақталатынын мәлімдеді. Ал күдікті мен жәбірленушінің туыстары өзара келісімге келгені, кешірім берілгені айтылды.