RUS
SMARTNEWS.KZ басылымының хабарлауынша, Жамбыл облысының орталығында 14 жасар жасөспірімнің мәйіті табылды. Ол пышақ жарақатын алғаны белгілі болды.
Оқиға 1 қыркүйекте, жаңа оқу жылы басталған күні болған. Полицияның алдын ала дерегі бойынша, жасөспірім қаладағы шағын аудандардың бірінде көз жұмған. Ақпарат әлеуметтік желідегі пабликтерде де тарады.
Болжам бойынша, пышақ жарақаты жүрек тұсына тиген.
Жамбыл облыстық полиция департаментінің мәліметінше, оқиғаға байланысты ҚР Қылмыстық кодексінің 99-бабы («Адам өлтіру») бойынша іс қозғалған. Жедел іздестіру шаралары барысында кәмелет жасына толмаған күдікті ұсталып, уақытша ұстау изоляторына қамалды.
«Қазіргі уақытта болған жайттың барлық мән-жайын анықтауға бағытталған тергеу және жедел іс-шаралар жүргізіліп жатыр. Тергеу мүддесіне байланысты басқа ақпарат жария етілмейді», — деді ведомство өкілдері.