RUS
SMARTNEWS.KZ басылымының хабарлауынша, Ресейдің Якутия аймағында екі қазақстандық азамат заңсыз алтын өндіру ісіне қатысы бар деген күдікпен қамауға алынды. Бұл туралы Orda.kz жазды.
Полиция 24 және 30 жастағы қазақстандықтар отырған автокөлікті тоқтатқан. Сондай-ақ, көлікте 48 жастағы ресейлік әйел болған. Тексеру барысында қазақстандықтардың жанынан металл сары түсті контейнерлер, құтылар және шағын түйіршіктер табылған. Сараптама олардың расымен де алтын екенін көрсетті.
Құқық қорғау органдарының мәліметінше, күдіктілер жаз айларында Якутияға келіп, өз беттерінше алтын құмдарын жуумен айналысқан. Олар жиналған металды Ресейдің басқа аймақтарына апарып, сатуды жоспарлаған.
Барлығы шамамен 2,5 келі алтын тәркіленді. Оның нарықтағы құны 14 млн рубльге (93,2 млн теңге) жуық.
Аталған факті бойынша қылмыстық іс қозғалды. Ресей заңнамасына сәйкес, мұндай әрекет үшін жеті жылға дейін бас бостандығынан айыру жазасы қарастырылған.
Orda.kz редакциясы Қазақстанның Сыртқы істер министрлігінен ұсталған азаматтарға қандай да бір құқықтық көмек көрсетілетіні туралы ресми түсініктеме сұрататынын хабарлады.