RUS
SMARTNEWS.KZ басылымының хабарлауынша, Қазақстанда әлеуметтік кодекске енгізілетін түзетулер арқылы бала күтімімен үйде отырған әкелердің де құқықтары аналармен теңестірілмек.
Жаңа нормаларға сәйкес, жұмыс істемейтін әкелер де үш жасқа дейінгі бала күтімі кезеңін зейнетақы өтіліне қоса алады. Бұған дейін мұндай мүмкіндік тек аналарға берілген еді. Конституциялық сот бұл жағдайды кемсітушілік деп танып, өзгеріс енгізуді талап еткен болатын.
Түзетулер қабылданса, бала тәрбиесіне негізгі жауапкершілік алған әкелер зейнетақы құқықтарынан айырылмайды. Бұл әсіресе анасы жұмыс істеп, әкесі үйде бала бағатын отбасылар үшін маңызды.
Еңбек және халықты әлеуметтік қорғау министрлігінің дерегінше, қазір елде шамамен 900 әке ресми түрде бала күтімі бойынша демалыста отыр және 1,5 жасқа дейінгі жәрдемақы алып келеді. Бұған дейін сарапшылар егер өзгеріс енгізілмесе, мұндай ер азаматтар зейнетақы өтілінен айырылып қалуы мүмкін екенін ескерткен. Енді олар да әйелдер секілді бала бағу кезеңінде зейнетақы жинағын толықтыра алады.