RUS
SMARTNEWS.KZ басылымының хабарлауынша, Алматы облысында қызғаныштың кесірінен 16 жастағы жасөспірімге азап көрсеткен әйелдер қамауға алынды.
Оқиға әлеуметтік желіде тарап, қоғамда үлкен резонанс тудырды. Әлеуметтік желі қолданушылары жәбір көрген қызды қорғауды талап етіп, күдіктілерге қатаң жаза беруді сұрап жатыр.
Жасөспірімнің анасының айтуынша, оқиға қызының бір ер адаммен университетке түсу мәселесін талқылаған қоңырауынан кейін басталған. Осыдан соң өзін сол ер адамның қалыңдығы деп таныстырған бейтаныс әйел қызға хабарласып, байланысын үзуді талап еткен.
Келесі күні әйел құрбысымен бірге қызды алдап көлікке отырғызып, оған күш көрсеткен. Олар жасөспірімнің телефонын тартып алып, ұрып-соғып, денесіне темекі басқан. Кейін өзенге апарып, суға тұншықтырып, қорлаған. Барлық әрекеттердің видеосы түсірілген.
Баланың анасы болған жағдайды полицияға жеткізді. Балалар құқықтары жөніндегі уәкіл Динара Закиеваның мәліметінше, материалдар құқық қорғау органдарына беріліп, күдіктілер ұсталған.
Қазір іс тергеліп жатыр.