RUS
SMARTNEWS.KZ басылымының хабарлауынша, Авиациялық әкімшілік 25 тамыз бен 5 қыркүйек аралығында 31 жеңіл ұшақты тексеріп шыққан. Нәтижесінде заңбұзушылықтар анықталып, жеті әуе кемесінің пайдаланылуы уақытша тоқтатылды.
Азаматтық авиация комитетінің хабарлауынша, соңғы кезде әлеуметтік желілерде жеке меншік ұшақтармен экскурсиялық рейстер жарнамаланып жүр. Алайда заң бойынша шағын авиация иелеріне ақылы қызмет көрсетуге немесе тапсырыс бойынша ұшуға рұқсат жоқ. Мұндай әрекет үшін жауапкершілік қарастырылған.
Биыл шағын әуе апаттары жиілеген. 22 маусымда Астана маңында оқу-жаттығу рейсін орындап жатқан TL-2000 маркалы жеңіл ұшақ құлап, екі адам көз жұмды. 17 тамызда Ақмола облысында Aerostar R40F9 ұшағы құлап, тағы екі адам қаза тапты. Марқұмдардың бірі туған күнін атап өтпек болған 43 жастағы Диана Ахметова еді.