RUS
SMARTNEWS.KZ басылымының хабарлауынша, әнші Ақбота Керімбекова балалық шағында көрген қиындықтарын еске алды. Өнер иесі бұл туралы «КешREG» бағдарламасында айтты.
Әншінің сөзінше, бетінде қал болғаны үшін ол бала кезінде қатарластарының мазағына жиі ұшыраған.
«Бетімдегі қалды бәрі біледі ғой. Сол үшін бала кезімде көп күлкіге қалатынмын. Мектепте де, балабақшада да «көк көз», «бетін балтамен ұрған» деп айтатын. Сол сөздерден кейін комплекстер пайда болды. Адамдардың көзіне түскім келмейтін. Суретке де түспей қашатынмын. Бірақ бәрібір Алланың қалауымен өнер жолына келіп, халық алдына шықтым. Мен қаламағанмен, тағдыр мені сахнаға әкелді», – деді Керімбекова.
Сондай-ақ әнші алғаш сахнаға шыққан кезін де еске алды.
«Ол кезде күндіз-түні ұйықтамай, 2-3 мың теңгеге тойға шығатынбыз. Соның ақшасын жинап, ән жаздырдық. «Аппақ гүлдер» әнінің аранжировкасын қарызға алдық. «Кейін төлейміз» деп мата сатып алып, одан өзімізге костюм тігіп сахнаға шығатынбыз. Әндерімізді тек көркемдік кеңестің рұқсатымен ғана насихаттайтынбыз», – деді ол.