RUS
SMARTNEWS.KZ басылымының хабарлауынша, Ақтөбеде өткен музыкалық фестивальде күтпеген жағдай орын алды. Танымал рэпер, Qarakesek лақап атымен белгілі Омар Амантаев сахнаға шыға алмады.
Куәгерлердің айтуынша, ұйымдастырушылар әншіні кешігіп келгені үшін концерт бағдарламасына енгізбей қойған. Ерекше жайт — Амантаев кештегі жалғыз жергілікті өнерпаз болған.
«Қаракесек Ақылбекті қолдау үшін тегін өнер көрсетпек болған. Бірақ сахнаға шықпады. Бұл ақтөбеліктер үшін өкінішті жағдай болды», – делінген aktobe_zello паблигінде.
Желіде қызу талқылау басталып кетті. Бір топ көрермен ұйымдастырушыларды қатты сынға алды.
«Ұят болды, жергілікті әртісті шығармады. Өз қаласының өнерпазына құрмет көрсетпеу – масқара», – деп жазды бір қолданушы.
«Қаракесек – халықтың сүйікті әншісі, жұрт соны күтіп барған еді. Артынан осылай істегендері обал», – деді тағы бірі.
Алайда, қарсы пікір айтқандар да табылды.
«Афишада аты мүлде көрсетілмеген. Уақыт тәртібі бар, егер кешіксе – бұл қалыпты жағдай», – деп жазды кей тыңдарман. «Фестивальде бәрі минутпен есептеледі. Біреу кешіксе, қалған өнерпаздарға әділетсіздік болар еді», – деген пікір де айтылды.
Көпшілік арасында «ұйымдастырушылар жергілікті өнер иелерін қолдауы керек еді» деген көзқарас басым болып тұр. Кейбір тұрғындар Қаракесекке арнайы сахналық кеш ұйымдастыруды ұсынып жатыр.