RUS
SMARTNEWS.KZ басылымының хабарлауынша, Петропавл тұрғындары тегін дәрі-дәрмек алу үшін түннің ортасында кезекке тұруға мәжбүр. 3-қалалық поликлиникада адамдар таңғы 4-тен бастап талон кезегін иеленеді, бірақ бәріне бірдей дәрі жетпейді.
Аптасына бірнеше рет қайталанатын дүрбелең әсіресе қант диабеті, жүрек-қан тамыр және өкпе ауруларына шалдыққан науқастарға қиын соғып отыр. Кезекке кіргендердің алды ғана қажетті препараттарға қол жеткізеді, қалғандары бос қайтады.
Поликлиника басшылығы мәселені мойындап отыр. Айтуларынша, дәріні есепке алатын электронды бағдарлама күніне небәрі 170–180 рецепт өңдей алады. Сол себепті талон саны шектелген. Бұған дейін жүйенің өткізу қабілеті жоғары болғанымен, соңғы жаңартулардан кейін баяулаған.
Қазір емхана 65 мың тұрғынға қызмет көрсетеді, олардың 7 мыңы тегін дәрі алуға құқылы. Бірақ қолданыстағы жүйе мұндай жүктемеге шыдамай тұр.