RUS
SMARTNEWS.KZ басылымының хабарлауынша, Атырауда кәмелетке толмаған студент қыз өз құрдасын аяусыз соққыға жықты. Оқиға сәті видеоға түсіп, әлеуметтік желіге тарағаннан кейін қоғамда қызу талқыға түсті.
Жағдай Жилгородок саябағында болған. Кадрларда бір қыздың екіншісіне бірнеше рет жұдырықпен соққы беріп, басынан тепкенін көруге болады. Жәбірленуші тіпті кешірім сұрап, тоқтатуды өтінгеніне қарамастан, шабуыл жалғаса берген.
«Жарайды, түсіндім, кешір, өтінемін. Болды... Кешір, енді қайталамаймын», – деп жалынғанына қарамай, күдікті аяусыз ұруын тоқтатпаған.
Полиция бұл оқиғаға қатысты түсініктеме берді.
«Атырауда колледж студенттері арасында жанжал шыққаны анықталды. Қазіргі уақытта қылмыстық іс қозғалып, тергеу амалдары жүргізілуде. Күдікті кәмелетке толмағандарды бейімдеу орталығына қамалды.
Барлық қатысушылар профилактикалық есепке алынып, іс кәмелетке толмағандар ісі жөніндегі комиссияға жолданды. Сонымен қатар жасөспірімдердің ата-аналарына бала тәрбиесіндегі заң бұзушылық үшін әкімшілік шара қолданылады.
Одан бөлек, полицияға хабарламай, жанжалдың видеосын түсіріп, таратқан жасөспірім де заң аясында жауапкершілікке тартылады», – делінген хабарламада.
Айта кетейік, соңғы уақытта жасөспірімдер арасындағы қатыгездік әрекеттердің видеолары жиілеп кетті. Қоғам белсенділері мұндай жағдайға тек полиция емес, ата-аналар мен білім беру мекемелері де қатаң назар аударуы қажет екенін айтып отыр.