RUS
SMARTNEWS.KZ басылымының хабарлауынша, Астанада сот үш рет жалған хабарлаған ер адамға үкім шығарды. Ол 112 қызметіне қоңырау шалып, автовокзалға бомба қойылғаны туралы бірнеше рет хабарлаған. Нәтижесінде 65 жастағы ер адам екі жылға бас бостандығынан айырылды.
Сот дерегінше, ол бұрын да дәл осындай қылмысы үшін екі рет сотталған. Тамыз айында қайтадан қоңырау шалып, жарылғыш зат қойылды деп мәлімдеген. Оқиға орнына шұғыл қызмет өкілдері шыққанымен, ақпарат жалған болып шықты.
Сот отырысында ер адам кінәсін мойындап, әрекетін тұрмыстық жағдайымен түсіндірді. Оның айтуынша, баспанасы жоқ, ал колонияда тегін тамақ пен киім бар.
«Сот оның бұрынғы қылмыстарынан сабақ алмағанын ескеріп, қатаң жаза тағайындады», — делінген ресми ақпаратта.
Енді ол жазасын қатаң режимдегі колонияда өтейді.