Бұл туралы Smartnews.kz сайты Көліктегі полиция департаментінің баспасөз қызметіне сілтеме жасап хабарлайды.
Павлодар облысының Май-Жұмыскер және Жұмыскер-Көктөбе аралықтарында бірден екі осындай жағдай болды. Екі ірі қара мал жолаушылар және жүк пойыздарының астына түскен. Теміржол көлігінің жоспарланбаған жалпы тоқтау уақыты 33 минутты құрады.
Осыған ұқсас жағдай Абай облысының Суықбұлақ-РЗД-6 аралығында да болды. Екі ірі қара малдың теміржол бойында жүруіне байланысты жүк пойызы машинисінің шұғыл тежеу қолдануына тура келді.
Мал иелеріне қатысты ҚР ӘҚБтК 559-бабы, яғни темiржолдардың бөлінген жолағында мал жаю қағидаларын бұзу бойынша әкімшілік хаттама толтырылды.
Сондай-ақ, Қарағанды облысының Қызылжар-Жеңіс аралығында үш жылқы, ал Шымкент станциясында үш ұсақ мал жүк пойызының астына түскен. Пойыздардың тұрағы екі жағдайда да 11 минутты құрады.
«Аталған фактілер бойынша да үй жануарларының иелеріне әкімшілік хаттамалар толтырылды»,-делінген хабарламада.
Көлік полицейлері тұрғындарға теміржол маңында үй жануарларын жаю кезінде қауіпсіздік шараларын сақтау керектігін тағы да еске салды.