RUS
SMARTNEWS.KZ басылымының хабарлауынша, Түркістан облысында зейнеткерді аса қатыгездікпен өлтірген Өзбекстан азаматына қатысты сот шешімі шықты. Арнайы мамандандырылған қылмыстық істер жөніндегі межрайондық сот оны қылмыстық жауапкершіліктен босатып, мәжбүрлеп емдеуге жіберді.
Қанды оқиға биыл мамыр айында Сарыағаш ауданындағы Жібек жолы ауылында болған. 39 жастағы күдікті көрші қартты балтамен ұрып, байлап тастаған. Жәбірленуші есін жоғалтқан соң, мойнын кесіп, артынша оның қолы мен жыныс мүшесін шапқан.
Сот-медициналық сараптама қорытындысында өлімнің себебі – жарақат пен қан кетуден болған шок деп көрсетілген. Сонымен қатар мойын тұсында кеңірдек, өңеш, бірінші мойын омыртқасы, жұлын және ірі тамырлар зақымданғаны анықталған.
Сот барысында айыпталушының кінәсі толық дәлелденді. Алайда психиатриялық сараптама оның алты жылдан бері есепте тұрған созылмалы «параноидты шизофренияға» шалдыққанын көрсетті.
Сот шешімі бойынша ол қылмыстық жауапкершіліктен босатылып, Алматы облысы Талғар ауданы Ақтас ауылындағы арнайы психиатриялық стационарға мәжбүрлеп емдеуге жіберілді.
Қаза тапқан зейнеткердің туыстары мұндай шешімге келіспей, апелляциялық шағым түсірді.