RUS
«Азық-түлік қауіпсіздігі мәселесі кешенді түрде шешіледі. Биыл жыл соңына дейін 536 млрд теңге сомасына агроөнеркәсіптік кешенді дамыту бойынша 291 инвестициялық жоба іске асырылады. Жалпы, 2023-2026 жылдары 2,6 трлн теңгеге 700 инвестициялық жобаны іске асыру жоспарланып отыр», - деді Ербол Қарашөкеев Үкімет отырысында баяндама жасай отырып.
Оның айтуынша, агроөнеркәсіп кешені субъектілері үшін кредит 2,5 пайызбен 10 жылға дейін беріледі.
«Сүт, құс еті, көкөніс импортын алмастыратын ірі өнеркәсіптік инвестиция жобаларын ілгерілету мақсатында СҚО тәжірибесі басқа өңірлерге енгізіледі. Ол бойынша өңір әкімдіктері 10 жыл мерзімге агроөнеркәсіп кешені субъектілеріне жеңілдетілген қайтарымды кредит (0,01% мөлшерлеме) бөлуді көздейді. Биыл осы мақсатқа 100 млрд теңге бөлінді. Соның есебінен шамамен 65 тауарлық сүт фермаларының құрылысы қаржыландырылады. Бұл сүт өндіру көлемін кемінде 373 мың тоннаға арттыруға мүмкіндік береді», - дейді ол.
Е. Қарашөкеев мәлімдегендей, жоғарыда аталған қадамдар бір жағынан ауылда жыл бойы жұмыспен қамтуды қамтамасыз етсе, екінші жағынан импортқа тәуелділіктен арылуға мүмкіндік береді.