RUS
SMARTNEWS.KZ басылымының хабарлауынша, Қазақстан Үкіметі есірткі және психотроптық заттар өндірісіне қатысы жоқ, тек өнеркәсіптік мақсатта қарасора (каннабис) өсіру тәртібін реттейтін қаулы қабылдады.
Негізгі талаптар:
құрғақ массасындағы тетрагидроканнабинол (ТГК) мөлшері 0,3%-дан аспауы тиіс;
тек «Тұқым шаруашылығы туралы» заңға сәйкес Мемлекеттік тізілімге енгізілген сорттар қолданылады;
екінші және одан кейінгі репродукциядағы тұқымдарды себуге тыйым салынады;
өсіру тек лицензия негізінде жүргізіледі.
Өсіру шарттары:
Қарасора егістігі елді мекендерден, жалпы қолданыстағы жолдардан және өзге ауыл шаруашылығы алқаптарынан кемінде екі шақырым қашықтықта орналасуы керек. Жер учаскесі нақты белгіленіп, қоршаумен (тор немесе тікенді сым) қорғалуы, тәулік бойы күзетпен қамтылуы және тек бір кіріп-шығу қақпасы болуы міндетті.
ТГК деңгейін бақылау:
-
тұқым себер алдында міндетті сараптамадан өтеді;
-
талдау екі кезеңде жасалады: себуден кейінгі 40–45 күнде және өнім жинау алдындағы 90–120 күнде.
Сараптаманы сот сараптамасы органдары шарттық негізде жүргізеді, шығынды заңды тұлғалар көтереді. Қорытынды бойынша ресми сараптама жасалады. Егер ТГК деңгейі нормадан асса, бүкіл егістік қайта тексеріледі, ал нормадан жоғары өнім толықтай жойылады.
Зертханаға тұқым мен өсімдіктің үлгілері дереу жеткізілуі тиіс. Қаптама қағаздан немесе талшықты материалдан жасалып, нөмірленіп, үлгі алынған жері мен көлемі көрсетіледі.