RUS
SMARTNEWS.KZ басылымының хабарлауынша, Шығыс Қазақстан облысында «Азаматтарға арналған үкімет» мемлекеттік корпорациясының филиалы басшысының орынбасары заңсыз алтын өндірді деген күдікке ілінді.
Қаржы мониторингі агенттігінің ШҚО департаменті Шыбынды өзенінің аңғарында заңсыз алтын өндіру және жер қойнауын рұқсатсыз пайдалану дерегі бойынша тергеу жүргізіп жатыр.
Тергеу мәліметінше, шенеунік өзге адамдармен бірігіп, «EastGoldStone» атты компанияны тіркеп, екі жыл бойы ешқандай лицензиясыз алтын өндірумен айналысқан. Олар ауыр техника қолданып, өзен арнасына да араласқан.
Экологиялық сараптама нәтижесінде табиғатқа келтірілген залал 300 млн теңгеден асқаны анықталды.
«Тінту кезінде жалпы құны 382 млн теңге болатын 6,7 келі алтын, 10 млн теңге мен 56 мың АҚШ доллары табылып, сот санкциясымен тәркіленді», — деп мәлімдеді агенттік.
Күдіктілер қазір екі айға қамауға алынды.
Тергеу жалғасып жатыр, ал өзге мәліметтер Қылмыстық-процестік кодекстің 201-бабына сәйкес жария етілмейді.