RUS
SMARTNEWS.KZ басылымының хабарлауынша, Шымкентте жұмысшы жастарға арналған мемлекеттік тұрғын үй бағдарламасы аясында берілген жүздеген пәтер заңсыз бөлінгені анықталды.
2019 жылы іске қосылған бағдарлама бойынша пәтерлер бес жыл мерзімге сатып алу құқығынсыз жалға берілген еді. Алайда тексеріс кезінде кейбір жалға алушылардың өз атына басқа жылжымайтын мүліктері тіркелгені, тіпті кейбірі бұл пәтерлерді үшінші тұлғаларға жалға беріп, табыс тауып жүргені белгілі болды. Осылайша 400-ден астам пәтер заңсыз берілген деп танылды.
Қала әкімдігі заңбұзушылықтар анықталған баспаналарды коммуналдық меншікке қайтаратындарын мәлімдеді. Ал пәтерлерді өз еркімен босатудан бас тартқандар сот арқылы шығарылатын болады.
«Тұрғын үй саясаты басқармасына тиісті ескерту жасалды. Қазір жағдай бақылауға алынды, мамандар белсенді түрде жұмыс істеп жатыр. Бағдарлама шарттарын бұзған 439 тұрғынды шығару туралы талап арыздар сотқа жолданды. Екі іс бойынша шешім әкімдік пайдасына шықты», — деді Шымкент қаласы әкімінің орынбасары Сәрсен Құранбек.