RUS
SMARTNEWS.KZ басылымының хабарлауынша, Қарағандыда әлеуметтік және ұлттық араздықты қоздырды деп айыпталған 22 жастағы Алика Мұхамадиеваға қатысты сот отырысы басталды.
Қылмыстық іс 3 қазанда сотқа түскен. Мұхамадиеваға Қылмыстық кодекстің 174-бабының 1-бөлігі («Әлеуметтік, ұлттық, рулық, нәсілдік немесе діни араздықты қоздыру») бойынша айып тағылған.
Прокурор Фарида Садуова сот процесін жабық режимде өткізуді сұрағанымен, судья Арғын Құтышев өтінішті қанағаттандырмады — тыңдау ашық түрде өтеді.
Прокурор айыптау актісін жариялаған соң, залда тыныштық орнады. Тергеу материалдарына сәйкес, Мұхамадиева Threads әлеуметтік желісінде «Aлика Августова» деген атпен діни және ұлттық сезімдерді қорлайтын пікірлер қалдырған.
«Ол жазбалардың көпшілікке тарайтынын біле тұра, ислам дінін ұстанушылар мен қазақ ұлты өкілдерінің намысына тиетін сөздер жазған», – деді прокурор.
Экспертиза қорытындысы бойынша, бұл жазбалар қоғамда жағымсыз пікір қалыптастырып, дінаралық қақтығысқа түрткі болуы мүмкін.
Сотта Алика Мұхамадиева көз жасына ерік беріп, өз кінәсін толық мойындады.
«Маған қоғам алдында, әсіресе мұсылмандар алдында ұят. Ешкімді қорлағым келген жоқ, бірақ сөздің қаншалықты ауыр соққы болатынын түсіндім. Бұл мен үшін үлкен сабақ болды», – деді ол.
Оның айтуынша, ол жазбаларды қатты эмоционалды күйзеліс кезінде — әжесінің қайтыс болуынан кейін және ұйқысыздықтың әсерімен жазған.
«Мен 86 күннен бері қамаудамын. Күн сайын қызымды ойлаймын. Ол түнде оянып, "мамам қайда?" деп сұрайды екен. Мен өз қателігіммен оны анасынан айырдым», – деп жылады Мұхамадиева.
Айыпталушының мүддесін екі адвокат пен оның әкесі — қоғамдық қорғаушы ретінде қорғауда.
Адвокат Тимур Солодуха соттан Мұхамадиеваның жасаған ісін мойындауы мен шынайы өкінуін, сондай-ақ оның кішкентай баласы барын ескере отырып, жазаны жеңілдетуді сұрады.
«Біз бостандығынан айырмайтын жаза сұраймыз — яғни айыппұл немесе бостандығын шектеу. Заң мұндай мүмкіндік береді. Максималды айыппұл шамамен 12 млн теңге, бірақ сот жеңілдетуші жағдайларды ескеріп, төменгі мөлшер тағайындай алады», – деді адвокат.
Сот тергеуі аяқталды. Алдағы отырыстарда тараптар жарыссөзге шығады. Айыпталушы қамауда қалды.
Еске салайық, жазда Алика Мұхамадиеваның Threads-тағы даулы пікірлері қоғамда үлкен резонанс тудырған болатын. Көп ұзамай ол ұсталып, қамауға алынған. Кейін ол өз сөздерінің контекстен жұлынып алынғанын айтып, көпшіліктен кешірім сұраған еді.