Қарғалы ауылында 7-сынып оқушысын 7 жасөспірім зорлаған көрінеді

Желіде күдіктілердің әрекеті түсірілген видео тараған. Бала құқықтары жөніндегі уәкіл Динара Закиева бұл жайтты растады. Оның айтуынша, күдіктілердің барлығы — кәмелетке толмағандар.

«Аймақтық уәкіл мен психологиялық қолдау орталығының мамандары дүйсенбіден бастап оқиға орнында жұмыс істеп жатыр. Тергеу жүріп жатыр», — деді ол.

Қылмыстық іс Қылмыстық кодекстің 124-бабы, 1-бөлігі («Жасөспірімге қатысты зорлық қолданбай нәпсіқұмарлық сипаттағы әрекеттер жасау») бойынша қозғалған. Тергеу жалғасып жатқан кезде ата-анасынан айырылған қызға психологтар көмек көрсетуде.

Аудандық білім бөлімі мектеп директоры оқиға жайлы тек 13 қазанда білгенін және бірден полицияға хабар бергенін айтады. Алайда жәбірленушінің туыстары бұл мәлімдемемен келіспейді — олардың сөзінше, қылмысты біраз уақыт жасыруға тырысқан.