Қарағандыда күдік тудырған шетел азаматтары ұсталды
Полицейлер есірткі сатумен айналысқан екі адамды қолға түсірді.
SMARTNEWS.KZ басылымының хабарлауынша, Қарағандыда синтетикалық есірткіні «жасырын таратумен» айналысқан екі шетел азаматы ұсталды. Арнайы операция есірткі айналымына қарсы республикалық «Қарасора–2025» шарасы аясында жүргізілген.
Полиция мәліметінше, қала көшелерінің бірінде 29 және 39 жастағы екі ер адам ұсталған. Екеуі де өзге елдің азаматтары және синтетикалық заттарды «қалташалар» арқылы сатқан деген күдікке ілінген.
Тінту кезінде олардың бірінен 22 орама есірткіге ұқсас A-PVP заты табылды. Екінші күдіктіден жасырын жеткізуді үйлестіруге арналған ұялы телефон тәркіленген. Кейін полиция көрсетілген мекенжайларды тексеріп, тағы 16 орама дәл осындай затты тапқан.
«Күдіктілердің тұрғылықты жерін тінту барысында алдын ала мефедрон деп анықталған 0,5 грамм есірткі табылды», — деп хабарлады облыстық полиция департаменті.
Ұсталғандар өз кінәсін мойындап, есірткіні жасырын орындарға қалдыру арқылы таратқанын айтқан. Барлық табылған заттар сараптамаға жіберілді.
Қазір күдіктілерге қатысты қылмыстық іс қозғалды. Олар уақытша ұстау изоляторына қамалды.
Материал авторы
