RUS
Украин көшбасшысы бейсенбі күні кешке АҚШ-тың Эндрюс әскери базасына қонған. Telegram парақшасында Зеленский:
«Алдағы сағаттарда америкалық қорғаныс компанияларымен кездесіп, қосымша әуе қорғаныс жүйелерін жеткізу мәселесін талқылаймыз. Сондай-ақ энергетика саласындағы серіктестермен кездесу жоспарланған. Ресей біздің энергетикалық жүйемізге күн сайын соққы жасап жатқанда, біз Украина тұрақтылығын арттыру бағытында жұмыс істеп жатырмыз», – деп жазды.
17 қазанда Владимир Зеленский Ақ үйде Дональд Трамппен келіссөз өткізеді.
«Таяу Шығыста террор мен соғысты тоқтатуға мүмкіндік берген серпін Ресейдің Украинаға қарсы соғысын да аяқтауға сеп болады деп сенеміз», – деді Зеленский, Трамптың қатысуымен Газа секторында қол жеткізілген атысты тоқтату келісімін меңзеп.
Сонымен қатар ол «Мәскеу “Tomahawk” туралы естіген соң ғана диалогқа оралуға асығып жатыр» деп мәлімдеді.
Бұған дейін Дональд Трамп Киевке Tomahawk қанатты зымырандарын (ұшу қашықтығы – 2500 км) жеткізу мүмкіндігін қарастырып жатқанын айтқан. Ол бұл мәселені Зеленскиймен Вашингтондағы кездесуде талқыламақ.
Украина басшысы, өз кезегінде, бұл зымырандарды тек әскери нысандарға қарсы қолдануға уәде берді.
Украиналық әскери сарапшы Олег Катковтың пікірінше, Tomahawk зымырандары Ресейдің ішкі аймақтарындағы қорғаныс зауыттарына соққы беру мүмкіндігін арттырады.
Ал АҚШ-тың Украинадағы бұрынғы елшісі, Атлантикалық кеңестің сарапшысы Джон Хербст бұл жеткізілімдер соғыстың тағдырын шешпесе де, Путинді келіссөз үстеліне отырғызуға итермелеуі мүмкін екенін айтты.